Yevropa Chempionlar ligasi guruh bosqichi bugungi bahslardan so'ng yakunlanadi. Ammo so'nggi turga qadar hali ham hech narsa aniq bo'lmagan yagona guruh mavjud. Bu - aynan "B" guruhidir.
Ushbu guruhdagi vaziyatni ko'rib, bu darajadagi mukammal ssenariy yozish mumkin emasligiga amin bo'lish mumkin. Tushuntiraman: hozirda 8 ochko bilan 1-o'rinda borayotgan "Borussiya M." pley-off yo'llanmasisiz qolishi va hozirda 5 ochko bilan 4-o'rinda borayotgan "Inter" esa aksincha yo'llanmani qo'lga kiritishi mumkin.
Demakki, bugungi har ikki bahs olov kabi yonayotgan maydonda kechadi...
Dastlab, e'tiborimizni "Juzeppe Meatsa" o'yingohidagi "Inter" va "Shaxtyor Donetsk" klublari bahsiga qaratamiz. Har ikki klubni-da, faqatgina g'alaba qanoatlantiradi (durang natija qayd etilganda, narigi o'yindagi "Real Madrid"ning yutkazishi yoki durang qayd etishi ham "Shaxtyor D."ni keyingi bosqichga olib chiqadi. Shunda, "Real M." va "Inter" guruhda qolib ketadi).
Demak, bugun "Inter" maydoniga safar qilayotgan ukrainaliklarda ham o'yin ambitsiyalari yuqori ekanligini ko'rish mumkin. Kamiga, ular qo'lga kiritgan barcha 7 ochkoni favoritlardan tortib olishdi ("Real M."dan har ikki bahsda g'alaba evaziga 6 ochko va "Inter" bilan dastlabki bahsdagi durang evaziga 1 ochko). Ushbu 3 ta bahslarda jamoa atiga 2 ta gol o'tkazib yuborgan.
"Inter" guruh bosqichining 5 ta bahsida atiga bir marotaba g'alaba qozona oldi. U ham bo'lsa, o'tgan turda, "Borussiya M." ustidan 3-2 hisobidagi g'alaba, ammo natijadan ham ko'rinib turibdiki, juda ham asabiy tarzda o'tdi. To'pga egalik qilishda ham (53-47), darvoza tomon aniq zarbalarda ham (5-4), seyvlarda ham (1-3) ko'rsatgan natijasi e'tibori bilan o'yinda g'alaba u qadar ishonchli emasligini tasdiqlamoqda.
Yuqoridagilardan kelib chiqib, bugungi bahsda ham, "Inter" g'alaba qozona olmaydi, deb hisoblayman.
Нет комментариев