Angliya Primyer-ligasining 5-turidan joy olgan "Everton" - "Liverpul" bahsi millionlab futbol ishqibozlarini teleekran qarshisiga rosmana "mixlay oladi".
"Everton" APL bahslarining dastlabki to'rttasida g'alaba qozongan holda, turnir jadvalini boshqarib bormoqda. Ko'pchilikni ushbu holat biroz ajablantirayotgan bo'lsa-da, men uchun u qadar g'ayritabiiy hech narsa yo'q. To'g'ri, 4 g'alaba va unda urilgan 12 ta gol ko'p narsalarni va'da qilayotgan esa-da, lekin ushbu bahslarda tom ma'noda hali-hanuz kuchli raqib bilan to'qnashmadi. "Tottenhem"-chi? Ha, "Tottenhem" bilan dastlabki turdagi g'alaba bor. Ammo o'sha bahsda, hali mavsum starti ekanligi va "Tottenhem" o'zining juda ko'plab vaziyatlarini ko'kka sovirganini hisobga olsak, u qadar maqtanishga arzimaydi. Keyingi 3 g'alabasi: turnir debyutanti "Vest Bromvich" 5-2 hisobida, Kristal Pelas 2-1 hisobida va autsayderlar qatorida borayotgan "Brayton" ustidan 4-2 hisobidagi g'alabalarni ko'rishimiz mumkin.
"Everton"ning barcha 12 golini sinchkovlik bilan ko'rib chiqdim. To'purarlar ro'yhati Son Hyon Min bilan birgalikda 6 tadan gol urgan holda qo'shhokimlik qilayotgan Dominik Kalvert-Lyuinning gollari yo bo'sh qolgan darvozaga urilgan, yo ikkinchi qavatdagi ustunlik hisobiga urilgan. Yozgi (kuzgi) transfer oynasi vaqtida "Real Madrid"dan sotib olingan Xames Rodriges darhaqiqat ajoyib futbol namoyish etmoqda (3 gol, 2 assist). "Everton"ning barcha o'yinida ushbu futbolchi eng yaxshi o'yinchi nomiga sazovor bo'ldi. Ammo, ertaga maydonga qaytishi kutilayotgan Jordan Xenderson u qadar erkin harakatlanishiga imkon bermasa kerak.
"Liverpul" uchun mavsum ajoyib boshlandi. Dastlabki turda mavsum kashfiyoti bo'lishi kutilayotgan Marselo Bielsa shogirdlari "Lids" klubini qabul qildi va gollar shousi bo'lgan bahsda 4-3 hisobida g'alaba qozondi. Har safar hisobda oldinda borgani esa ko'p narsadan darak. So'ng, ajoyib formadagi "Chelsi" (2-0) va "Arsenal" (3-1) dog'da qoldirildi. Ho'sh, o'sha ma'shum "Aston Villa" bilan bahsda nima ro'y berdi? Bu savolga hatto "Liverpul" a'zolari ham javob bera olmasa kerak. Shunchaki bu yomon tush edi. Himoya butkul sochilib ketdi, Adrianning qo'pol xatolari va ruxiy tushkunlik birlashib ushbu hisob (7-2) yuzaga kelishiga sabab bo'ldi. Ammo o'rtadagi tanaffus ularga ijobiy ta'sir etishi kerak. Qolaversa, bir qator futbolchilar safga qaytmoqda. Hususan, Sadio Mane va Tiago Alkantara. Ayniqsa, Manening qaytishi "Liverpul" hujumlaridagi xilma-xillikni oshiradi.
Ushbu bahsda, "Liverpul"ning 2 to'p farqi bilan g'alaba qozonishini kutmoqdaman.